ខេត្តបាត់ដំបង ៖ កាលពីរសៀលថ្ងៃទី ០៨ មិថុនា ឆ្នាំ២០២៤ តាមប្រភពព័ត៏មានបានរាយការណ៍ឲ្យដឹងថា សង្វៀនស្ថិតក្នុងភូមិចកធំ ឃុំកកោះ ស្រុកមោងឬស្សី។ សង្វៀនជល់មាន់ដ៏ធំនេះ ជ្រកក្រោមអំណាចមន្ត្រីយោធាម្នាក់ឈ្មោះ ចែវ និត ហៅ មិត្ត ហើយគេសង្ស័យថា អាចមានការឃុបឃិតបើកដៃពីសមត្ថកិច្ចគ្រប់លំដាប់ថ្នាក់ផងដែរ ទើបសង្វៀនបញ្ជល់មាន់ដ៏ធំមហិមារបស់លោក មិត្ត នេះអាចដំណើរការបានរាប់ខែកន្លងទៅយ៉ាងរលូនរហូតមកដល់សព្វថ្ងៃនេះ។
ទីតាំងល្បែងជល់មាន់របស់លោក ចែវ និត ហៅ មិត្ត នេះបើកលេងនៅលើទីទូលមួយ គ្របដណ្ដប់ដោយម្លប់ដើមឈើយ៉ាងត្រជាក់ល្ហឹម។ ទីតាំងនោះនៅក្បែរ«វត្តចក» ស្ថិតក្នុងភូមិ ឃុំនេះ ។ សង្វៀនមាន់ដ៏ធំនេះ បើកលេងថ្ងៃសៅរ៏ និង ថ្ងៃអាទិត្យ។ សង្វៀននេះធំ និង តែមួយកន្លែងទេ តែបើកជល់រហូតដល់០៦វង់ (៦សង្វៀនស្មើនឹង៦គូ)។ មួយថ្ងៃៗមានមនុស្សរាប់រយនាក់ចូលលេង ដោយមិនខ្វល់ខ្វាយពីការបង្ក្រាបរបស់សមត្ថកិច្ចឡើយ។ម្ចាស់សង្វៀននេះធានាសុវត្ថិភាព ដោយអះអាងប្រាប់អ្នកលេងថា «បានបង់លុយគ្រប់ស្ថាប័នសមត្ថកិច្ច និង គ្រប់លំដាប់ថ្នាក់» ដូច្នេះហើយទើបអ្នកដែលចូលចិត្តល្បែងជល់មាន់នេះ នាំគ្នាមកពីចម្ងាយ តាមបណ្ដាស្រុកផ្សេង ហើយក៏មានអ្នកខ្លះមកពីខេត្តពោធិសាត់ផងដែរ សម្រុកទៅលេងនៅសង្វៀនមាន់របស់មន្ត្រីយោធានេះ។
បើពិនិត្យលើទិដ្ឋភាពជាក់ស្ដែងទៅលើសកម្មភាពប្រព្រឹត្តល្បែងស៊ីសង នៅក្នុងសង្វៀនមាន់របស់មន្ត្រីយោធាឈ្មោះ មិត្ត ខាងលើនេះ គេឃើញមានមនុស្សរាប់រយនាក់ ស្រែកកងរំពងនៅក្នុងក្រោមម្លប់ឈើយ៉ាងត្រជាក់។ឯអ្នកលក់ដូរនំចំណី បាយទឹក ក៏សប្បាយនិងប្រមូលលុយពីសង្វៀនមាន់នេះដែរ ដែលមើលទៅហាក់មាន«សុខសន្តិភាព» សម្បើមណាស់ ។តាមការកត់សម្គាល់ កិច្ចប្រតិបត្តិការបង្ក្រាបបនល្បែងស៊ីសងខុសច្បាប់នេះ សមត្ថកិច្ចតែងមានការភ្ញាក់រលឹកដុតដៃ ដុតជើងតែមួយចម្អិនកំពឹសប៉ុណ្ណោះ នៅពេលរដ្ឋមន្ត្រីក្រសួងមហាផ្ទៃ ឬ ប្រមុខរាជរដ្ឋាភិបាលស្រែកចេញបញ្ជាឲ្យបង្ក្រាបបនល្បែងស៊ីសងខុសច្បាប់។ ប៉ុន្តែកិច្ចប្រតិបតិ្តការរបស់សមត្ថកិច្ចនេះ ហាក់កម្រើកត្រិមមួយដង្ហើមចង្រិតក៏រលត់ដង្ហើមផុតទៅ។ ពោល កិច្ចប្រតិបត្តិការនេះហាក់ធ្វើឡើងគ្រាន់តែល្អមើល ដើម្បីរាយការណ៏ជូនថ្នាក់លើតែប៉ុណ្ណោះ។
ជាក់ស្ដែង ដូចជាសង្វៀនជល់មាន់ដ៏ធំមហិមា នៅស្រុកមោងឬស្សី នេះ ដែលជ្រកក្រោមស្លាបសមត្ថកិច្ច និង ក្រោមអំណាចផ្ទាល់របស់មន្ត្រីយោធាឈ្មោះ ចែវ និត ហៅ មិត្ត នេះគឺជាឧទាហរណ៏ស្រាប់។ សង្វៀននេះបើកលេងយ៉ាងគគ្រឹកគគ្រែង ច្រើនខែកន្លងមកហើយ តែពុំដែលមានសមត្ថកិច្ចឬអាជ្ញាធរ ចុះបង្អើលម្ដងណាទេ។ យោងតាមគោលនយោបាយភូមិឃុំមានសុវត្ថិភាព គេរង់ចាំមើលថា តើលោកស្នងការនគរបាលខេត្ត ក៏ដូចជាអាជ្ញាធរឃុំ ស្រុក ខេត្ត ដឹកនាំដិយលោកសុខលូមានវិធានការបែបណា ចំពោះសង្វៀនមាន់ដ៏ធំរបស់ដង្វៅមាន់ជល់ ឈ្មោះ និត ហៅ មិត្ត នៅឃុំកកោះ ស្រុកមោងឬស្សី នេះ ? មាតុភូមិ
