ភ្នំពេញ ៖ លោករដ្ឋមន្រ្តី នេត្រ ភក្ត្រា បានលើកថា ក្រសួងព័ត៌មាននឹងខិតខំបង្កើនការផលិតនូវកម្មវិធីល្អៗគ្រប់រូបភាពប្រកបដោយភាពទាក់ទាញឱ្យកាន់តែច្រើន ដើម្បីអប់រំកុមារឱ្យប្រព្រឹត្តិអំពើល្អ និងលើកកម្ពស់ការយល់ដឹងរបស់ប្រជាពលរដ្ឋ អំពីតម្លៃរបស់កុមារនិងអំពីបញ្ហាប្រឈមនានារបស់កុមារ ។ នេះជាការថ្លែងរបស់ លោកនេត្រ ភក្ត្រារដ្ឋមន្ត្រីក្រសួងព័ត៌មាន និងលោកស្រី ទុយ សិរីរតនៈនេត្រ ភក្ត្រា ប្រធានកិត្តិយសសមាគមនារីដើម្បីសន្តិភាព និងអភិវឌ្ឍន៍សាខាក្រសួងព័ត៌មាន ក្នុងឱកាសអញ្ជើញជាអធិបតីក្នុងពិធីបិទមហោស្រពតន្ត្រី និងចម្រៀងកុមារ ឆ្នាំ២០២៤ពានរង្វាន់ក្រសួងព័ត៌មាន នៅព្រឹកថ្ងៃទី២៧ ខែឧសភាឆ្នាំ២០២៤ នាសាលចតុម្មុខមង្គល ទីស្តីការក្រសួងព័ត៌មាន ។ លោករដ្ឋមន្ត្រី នេត្រ ភក្ត្រា បានគូសបញ្ជាក់ថា ក្រសួងព័ត៌មាន ដែលមានប្រព័ន្ធផ្សព្វផ្សាយ និងក្រុមការងារដើម្បីកុមារជាសេនាធិការ នឹងបន្តរៀបចំផលិតកម្មវិធីថ្មីបន្ថែមទៀតទាក់ទងកិច្ចការងារកុមារបន្ទាប់ពីក្រសួង បានរៀបចំមហោស្រពតន្ត្រី និងចម្រៀងកុមារ ឆ្នាំ២០២៤ពានរង្វាន់ក្រសួងព័ត៌មាន ឈានមកដល់ថ្ងៃបញ្ចប់ដោយជោគជ័យ ។ តាមរយៈជោគជ័យនៃដំណើរការកម្មវិធីមហោស្រពតន្រ្តី និងចម្រៀងកុមារនេះដែរ ឯកឧត្តម រដ្ឋមន្រ្តីនេត្រ ភក្ត្រាលើកទឹកចិត្តឱ្យមានការប្រារព្ធធ្វើមហោស្រពចម្រៀងកុមារ ឱ្យបានជាប់ជារៀងរាល់ឆ្នាំ ហើយសង្ឃឹមថា លោកលោកស្រី និងសប្បុរសជននានា នឹងបន្តជួយឧបត្ថម្ភជ្រោមជ្រែងដល់កម្មវិធីនេះ ដើម្បីជាឧត្តមប្រយោជន៍សម្រាប់កុមារដែលជាទំពាំងស្នងឫស្សីរបស់កម្ពុជាទៅថ្ងៃអនាគត។ សូមក្មួយៗ កុមារា កុមារី ទាំងអស់ខិតខំកសាងខ្លួន សិក្សារៀនសូត្រដើម្បីក្លាយជាកូនល្អ សិស្សល្អ មិត្តល្អនិងពលរដ្ឋល្អ ដែលជាធនធានដ៏សំខាន់ក្នុងការរួមចំណែកអភិវឌ្ឍន៍ប្រទេសជាតិ ។ លោក សូមអរគុណដល់គ្រប់ផ្នែកពាក់ពន្ធ័ទាំងអស់ កវីនិពន្ធ ដែលបានរួមគិត រួមធ្វើជាមួយគ្នា ដើម្បីបុព្វហេតុជាតិ និងគុណប្រយោជន៍កុមារកម្ពុជា តាមរយៈការបង្កើតស្នាដៃនិពន្ធបទភ្លេង និងទំនុកច្រៀងសម្រាប់កុមារដោយឈរលើគោលការណ៍ ងាយចេះ ងាយចាំ។ នៅក្នុងឱកាសនេះដែរ លោក រដ្ឋមន្រ្តី សូមថ្លែងអំណរគុណ និងសម្តែងនូវការវាយតម្លៃខ្ពស់ចំពោះក្រសួងអប់រំយុវជននិងកីឡាក្រសួងវប្បធម៌ និងវិចិត្រសិល្បៈ ក្រុមប្រឹក្សាជាតិកម្ពុជាដើម្បីកុមារក្រុមការងារដើម្បីកុមារក្រសួងព័ត៌មានអគ្គនាយកដ្ឋានជំនាញទាំង៥ ក្រុមតន្ត្រី និងអ្នកចម្រៀងក្រសួងព័ត៌មាន ដែលបានរួមគ្នាខិតខំសម្រប សម្រួលរៀបចំបានយ៉ាងល្អប្រសើរ និងសម្រេចបានលទ្ធផលប្រកបដោយជោគជ័យ «មហោស្រពតន្ត្រី និង ចម្រៀងកុមារពានរង្វាន់ក្រសួងព័ត៌មាន» នាពេលនេះ។ ជាពិសេសសូមថ្លែងអំគុណយ៉ាងជ្រាលជ្រៅដល់រាជរដ្ឋាភិបាលកម្ពុជា ដែលបានផ្តល់ការគាំទ្រថវិកាសម្រាប់ដំណើរការកម្មវិធី រួមទាំងការគាំទ្រជាថវិកាពីសប្បុរជន និងបណ្តាក្រុមហ៊ុន ធនាគារ នានារួមមាន,ធនាគាកាណាឌីយ៉ា, ក្រុមហ៊ុន រ៉ូយ៉ាល់ Group ,ក្រុមហ៊ុនវឌ្ឍនៈប្រូវើរី , Krud energy , V-active ,ក្រុមហ៊ុន chipmong Group,ក្រុមហ៊ុន Metfone…
