កិច្ចប្រជុំកំពូលវិសាមញ្ញលើកដំបូងរវាងមេដឹកនាំអារ៉ាប់នឹងមេដឹកនាំមូស្លីមបានធ្វើឡើងនៅថ្ងៃទី 11 ខែវិច្ឆិកា នៅទីក្រុងរីយ៉ាដ ប្រទេសអារ៉ាប៊ីសាអ៊ូឌីត ដើម្បីស្វែងរកមធ្យោបាយដើម្បីបញ្ចប់ការវាយប្រហារដោយយោធាអុីស្រាអែល ការឈ្លានពានរបស់យោធាអុីស្រាអែលទៅលើតំបន់ហ្គាហ្សាស្ទ្រីប។
មេដឹកនាំអារ៉ាប់និងមូស្លីមដែលចូលរួមសន្និសីទបានអំពាវនាវឱ្យតុលាការឧក្រិដ្ឋកម្មអន្តរជាតិ (ICC) ធ្វើការស៊ើបអង្កេតលើសកម្មភាពឧក្រិដ្ឋកម្មរបស់យោធាអុីស្រាអែលប្រឆាំងនឹងប៉ាឡេស្ទីននៅតំបន់ហ្គាហ្សាស្ទ្រីប។ សេចក្តីថ្លែងការណ៍រួមបានបញ្ចប់សន្និសីទនេះ ហើយបានអំពាវនាវឱ្យក្រុមប្រឹក្សាសន្តិសុខអង្គការសហប្រជាជាតិធ្វើអន្តរាគមន៍ភ្លាមៗដើម្បីបញ្ចប់យុទ្ធនាការវាយប្រហារមិនរើសមុខរបស់កងទ័ពអុីស្រាអែល និងបង្កើតលក្ខខណ្ឌសម្រាប់ជំនួយមនុស្សធម៌អន្តរជាតិក្នុងការចូលទៅកាន់តំបន់ហ្គាហ្សាស្ទ្រីប។
ក្រុមអ្នកវិភាគបាននិយាយថា អារ៉ាប៊ីសាអូ៊ឌីតព្រួយបារម្ភអំពីការអូសទាញចូលទៅក្នុងជម្លោះដោយសារតែទំនាក់ទំនងជិតស្និទ្ធរបស់ខ្លួនជាមួយសហរដ្ឋអាមេរិក ក៏ដូចជាការណ៍ពិតដែលថាប្រទេសនេះកំពុងស្វែងរកការធ្វើឱ្យទំនាក់ទំនងធម្មតាជាមួយអុីស្រាអែលមុនពេលជម្លោះផ្ទុះឡើង។
ជំនួយការអគ្គលេខាធិការសម្ព័ន្ធអារ៉ាប់ លោក Hossam Zaki បានប្រកាសថា សម្ព័ន្ធអារ៉ាប់នឹងធ្វើសកម្មភាពក្នុងឆាកអន្តរជាតិ ដើម្បីគាំទ្រប៉ាឡេស្ទីននិងប្រជាជននៅតំបន់ហ្គាហ្សា ខណៈពេលដែលថ្កោលទោសការកាន់កាប់របស់អុីស្រាអែលនិងទទួលខុសត្រូវចំពោះយុទ្ធនាការយោធារបស់គាត់។
ជាពិសេស ប្រធានាធិបតីអុីរ៉ង់ លោក Ebrahim Raisi បានសង្កត់ធ្ងន់ថា វាដល់ពេលដែលត្រូវចាត់វិធានការជំនួសឱ្យការគ្រាន់តែពិភាក្សាអំពីជម្លោះនៅតំបន់ហ្គាហ្សា។ លោកបានមានប្រសាសន៍ថា ការរួបរួមរបស់ប្រទេសមូស្លីមមានសារៈសំខាន់ខ្លាំងណាស់។
អុីស្រាអែលកំពុងប្រឈមមុខនឹងសម្ពាធកាន់តែខ្លាំងឡើងពីសហគមន៍អន្តរជាតិ រួមទាំងសម្ព័ន្ធមិត្តជិតស្និទ្ធរបស់សហរដ្ឋអាមេរិក ដើម្បីការពារប្រជាជនប៉ាឡេស្ទីននៅតំបន់ហ្គាហ្សា ខណៈដែលចំនួនអ្នកស្លាប់និងរបួសកើនឡើង និងការប៉ះទង្គិចគ្នានៅជិតមន្ទីរពេទ្យកាន់តែខ្លាំងក្លា។ ទោះបីជាយ៉ាងណាក៏ដោយ នាយករដ្ឋមន្ត្រីអុីស្រាអែល លោក Benjamin Netanyahu បាននិយាយថា មេដឹកនាំពិភពលោកគួរតែថ្កោលទោសកងកម្លាំងហាម៉ាស់មិនមែនអុីស្រាអែលទេ៕ ដោយ៖ ធីរីណា
