ថ្ងៃទី៧ ខែកញ្ញា ជប៉ុនបានបាញ់បង្ហោះរ៉ុក្កែតបញ្ជូនយានទៅកាន់ឋានព្រះចន្ទ

ក្រុមហ៊ុន Mitsubishi Heavy Industries Ltd (MHI) ដែលជាក្រុមហ៊ុនសម្ព័ន្ធរបស់សាជីវកម្ម Mitsubishi ប្រទេសជប៉ុន បានប្រកាសអំពីផែនការនៃការបាញ់បង្ហោះរ៉ុក្កែត H2A booster ដែលដឹកយានទៅកាន់ឋានព្រះចន្ទ (SLIM) របស់ទីភ្នាក់ងារអវកាសជប៉ុន នៅថ្ងៃទី៧ខែកញ្ញាខាងមុខនេះ។
ឧបករណ៍ជំរុញ H2A ត្រូវបានដាក់នៅលើបន្ទះបាញ់បង្ហោះនៅមជ្ឈមណ្ឌលអវកាស Tanegashima ក្នុងខេត្ត Kagoshima ប្រទេសជប៉ុន ។ យោងតាម MHI ការបាញ់បង្ហោះនេះត្រូវបានគេរំពឹងថានឹងធ្វើឡើងនៅមជ្ឈមណ្ឌលអវកាស Tanegashima នៅលើកោះ Tanegashima ក្នុងខេត្ត Kagoshima ភាគនិរតីនៃប្រទេសជប៉ុន។ ពីមុនការបាញ់បង្ហោះគ្រោងនឹងធ្វើឡើងនៅថ្ងៃទី 28 ខែសីហា ប៉ុន្តែ MHI បានប្រកាសពន្យារពេលដោយសារខ្យល់ខ្លាំង។
គេរំពឹងថា SLIM នឹងចូលទៅក្នុងគន្លងជុំវិញព្រះចន្ទប្រហែល 3-4 ខែគិតចាប់ពីពេលបាញ់បង្ហោះ ហើយនឹងអាចចុះចតលើផ្ទៃព្រះចន្ទបានបន្ទាប់ពី 4-6 ខែ។ ប្រសិនបើជោគជ័យ ទិន្នន័យដែលប្រមូលបានដោយប្រទេសជប៉ុនពីឋានព្រះចន្ទនឹងត្រូវបានប្រើសម្រាប់គម្រោង Artemis ដឹកនាំដោយសហរដ្ឋអាមេរិក ដែលមានបំណងបញ្ជូនមនុស្សទៅឋានព្រះចន្ទនៅឆ្នាំ 2025។
ប្រសិនបើទទួលបានជោគជ័យនោះ ជប៉ុននឹងក្លាយទៅជាប្រទេសទី៥ បញ្ចូនយានទៅកាន់ឋានព្រះចន្ទ បន្ទាប់ពី អាមេរិក រុស្ស៊ី ចិន ឥណ្ឌា ៕ ដោយ៖ ធីរីណា