អ៊ុយក្រែនកំពុងស្ថិតនៅក្នុងវិបត្តិដោយសារទាហានរត់ចោលជួរ និងហានិភ័យនៃការខ្វះខាតសព្វាវុធ

យោងតាម The Economist អ៊ុយក្រែនកំពុងប្រឈមមុខនឹងឧបសគ្គធំៗ ដោយសារកង្វះទាំងកម្លាំង និងធនធាន ដើម្បីប្រឈមមុខជាមួយរុស្ស៊ី។

បច្ចុប្បន្ន លោក Zelensky កំពុងបំពេញទស្សនកិច្ចនៅសហរដ្ឋអាមេរិក ដើម្បីទាក់ទាញការគាំទ្រពីលោកខាងលិច ជាពិសេសផ្នែកហិរញ្ញវត្ថុ និងយោធា ដើម្បីជួយក្រុងកៀវរក្សាសង្រ្គាម។
The Economist ពិពណ៌នាអំពីស្ថានភាពលំបាកនៃសេដ្ឋកិច្ចរបស់អ៊ុយក្រែន និងកម្លាំងយោធាចុះខ្សោយ។ ខណៈពេលដែលទីក្រុងម៉ូស្គូអាចអំពាវនាវដល់អ្នកស្ម័គ្រចិត្ត ចំណែកទីក្រុង Kiev ត្រូវតែពឹងផ្អែកលើការបំពេញកាតព្វកិច្ចយោធា។
ទោះយ៉ាងណា មន្ត្រីជាច្រើនបាននិយាយថា អ្នកដែលហៅចូលកងទ័ពមិនត្រូវតាមស្តង់ដារប្រយុទ្ធទេ ព្រោះពួកគេចាស់ពេក មានសុខភាពខ្សោយ ឬមានបញ្ហាគ្រឿងស្រវឹង។ អ្វីដែលគួរឲ្យព្រួយបារម្ភជាងនេះទៅទៀត គឺគ្មានផ្លូវច្បាស់លាស់សម្រាប់អ្នកដែលបានចុះឈ្មោះចូលបម្រើយោធាដូចជា « ផ្លូវទៅកាន់ស្តេចក្តីស្លាប់»។
របាយការណ៍ក៏បានបង្ហាញផងដែរថា ទាហានប្រហែល ៥-១០% បានចាកចេញពីមុខតំណែងដោយគ្មានការអនុញ្ញាត។ ក្នុងពេលជាមួយគ្នានេះ មានតែជនជាតិអ៊ុយក្រែន 30% ប៉ុណ្ណោះដែលចាត់ទុកថាវាជាការអាម៉ាស់ក្នុងការជៀសវាងការបម្រើយោធា។ វាក៏មានភាពខុសគ្នាពីជំនាន់ផងដែរ៖ បុរសវ័យក្មេងដែលមានសិទ្ធិចូលបម្រើយោធាគឺមិនសូវគាំទ្រគោលនយោបាយដ៏តឹងតែងរបស់លោក Zelensky ជាងមនុស្សចាស់នោះទេ។
នៅក្នុងវិចារណកថាមួយផ្សេងទៀត The Economist បានព្រមានថាប្រធានាធិបតី Zelensky ប្រហែលជា “ប្រឈមនឹងការពិត” ជាមួយនឹងយុទ្ធសាស្ត្រយោធារបស់គាត់។ ប្រសិនបើគាត់បន្តដើរតាមផ្លូវនេះ គាត់ប្រថុយនឹងការបាត់បង់ការគាំទ្រទាំងក្នុង និងក្រៅប្រទេស ហើយបណ្តាលឱ្យមានការបែកបាក់កាន់តែស៊ីជម្រៅនៅក្នុងសង្គមអ៊ុយក្រែន៕ ដោយ៖ ធីរីណា