ចិនបានបញ្ជាក់ថាខ្លួននឹងមិនចូលរួមក្នុងសន្និសីទសន្តិភាពអ៊ុយក្រែនក្នុងប្រទេសស្វីសនោះឡើយ

ប្រទេសចិនបានបញ្ជាក់ថា ខ្លួននឹងមិនចូលរួមសន្និសីទសន្តិភាពស្តីពីអ៊ុយក្រែនដែលរៀបចំដោយប្រទេសស្វីសនៅខែក្រោយនោះទេ ពីព្រោះសន្និសីទនេះមិនបានបំពេញតាមតម្រូវការរបស់ទីក្រុងប៉េកាំង។
ថ្លែងក្នុងសន្និសីទសារព័ត៌មាននាថ្ងៃទី ៣១ ឧសភា អ្នកនាំពាក្យក្រសួងការបរទេសចិន លោក ស្រី Mao Ning បានសង្កត់ធ្ងន់ថា សំណើរបស់ចិនសម្រាប់សន្និសីទសន្តិភាពអន្តរជាតិដែលទទួលស្គាល់ដោយរុស្ស៊ី និងអ៊ុយក្រែនគឺ “យុត្តិធម៌” និង “មិនលំអៀង” និងមិនសំដៅលើភាគីណាមួយឡើយ។ លោកស្រី Mao Ning បាននិយាយថា “ប្រទេសចិនយកចិត្តទុកដាក់យ៉ាងខ្លាំងចំពោះការធ្វើជាម្ចាស់ផ្ទះនៃកិច្ចប្រជុំកំពូលសន្តិភាពអ៊ុយក្រែនលើកដំបូងរបស់ប្រទេសស្វីស ហើយបានធ្វើការជាមួយនឹងភាគីស្វីស និងភាគីពាក់ព័ន្ធទាំងអស់ចាប់តាំងពីដើមឆ្នាំនេះមក”។
កន្លងមក ចិនបាននិយាយថា សន្និសីទត្រូវតែមានការចូលរួមពីរុស្ស៊ី និងអ៊ុយក្រែន។ នាពេលថ្មីៗនេះ ប្រធានាធិបតីចិនលោក Xi Jinping បានសង្កត់ធ្ងន់លើទស្សនៈថា ការចរចាសន្តិភាពត្រូវបានទទួលស្គាល់ដោយរុស្ស៊ី និងអ៊ុយក្រែនថាជាមធ្យោបាយដ៏ល្អបំផុតដើម្បីបញ្ចប់ជម្លោះដែលកំពុងបន្តរវាងប្រទេសទាំងពីរ។ នៅសប្តាហ៍នេះ ប្រទេសចិនបានជូនដំណឹងទៅអ្នកការទូតថាលក្ខខណ្ឌដែលកំណត់ដោយទីក្រុងប៉េកាំងមិនត្រូវបានបំពេញ ហើយសន្និសីទត្រូវតែទទួលស្គាល់ដោយរុស្ស៊ី និងអ៊ុយក្រែន ហើយទាមទារឱ្យមានការចូលរួមស្មើៗគ្នាពីគ្រប់ភាគី ហើយគួរតែមានការពិភាក្សាដោយយុត្តិធម៌នៃសំណើទាំងអស់។
ខាងភាគីរុស្ស៊ី រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយថា ការចរចាក្នុងក្របខណ្ឌនៃសន្និសីទខាងលើ ចាំបាច់ត្រូវគោរពស្ថានការណ៍នៅលើមូលដ្ឋាន ចាំបាច់ត្រូវកំណត់អត្តសញ្ញាណដើមហេតុនៃជម្លោះ ទើបអាចដោះស្រាយបានតាំងពីដើមរៀងមក៕