ប្រែសម្រួល : កញ្ញាដាលីស (ដេល្លីម៉េល) ៖ Neuralink ដែលជាក្រុមហ៊ុនថ្មីថ្មោងរបស់លោក អេឡុន ម៉ាស កាលពីថ្ងៃព្រហស្បតិ៍ បាននិយាយថាខ្លួនបានទទួលការយល់ព្រមពីនិយតករអាម៉េរិកដើម្បីធ្វើតេស្តិ៍ឧបករណ៍ផ្សាំក្នុងខួរក្បាលមនុស្ស។
ក្រុមហ៊ុន Neuralink បាននិយាយថា ការអនុញ្ញាតពីរដ្ឋបាលចំណីអាហារនិងឱសថអាម៉េរិក (FDA)សម្រាប់ការសិក្សាគ្លីនិកចំពោះមនុស្សជាលើកដំបូងរបស់ខ្លួននេះគឺជា “ជំហានដំបូងដ៏សំខាន់” សម្រាប់បច្ចេកវិជ្ជារបស់ខ្លួន ដែលមានបំណងអនុញ្ញាតឱ្យខួរក្បាលធ្វើអន្តរកម្មដោយផ្ទាល់ជាមួយកុំព្យូទ័រ។
ក្រុមហ៊ុន Neuralink បាននិយាយនៅក្នុងសារបង្ហោះនៅលើ Twitterថា “យើងពិតជារំភើបក្នុងការចែករំលែកថា យើងបានទទួលការយល់ព្រមពី FDAដើម្បីចាប់ផ្តើមការសិក្សាគ្លីនិកលើមនុស្សជាលើកដំបូង។ នេះគឺជាលទ្ធផលនៃការងារមិនគួរឱ្យជឿដោយក្រុមការងាររបស់ Neuralink ក្នុងកិច្ចសហការយ៉ាងជិតស្និទ្ធជាមួយ FDA”។
យោងតាមក្រុមហ៊ុន Neuralink ការជ្រើសរើសមនុស្សសម្រាប់ការធ្វើតេស្តិ៍គ្លីនិកមិនទាន់ត្រូវបានបើកនៅឡើយទេ។
លោកម៉ាសបាននិយាយក្នុងអំឡុងពេលធ្វើបទបង្ហាញនៅក្រុមហ៊ុននេះកាលពីខែធ្នូថា គោលបំណងនៃឧបករណ៍ផ្សាំរបស់ Neuralink គឺដើម្បីឱ្យខួរក្បាលមនុស្សអាចធ្វើទំនាក់ទំនងដោយផ្ទាល់ជាមួយកុំព្យូទ័រ។
លោកបាននិយាយនៅពេលនោះថា “យើងធ្វើការយ៉ាងលំបាកដើម្បីត្រៀមខ្លួនសម្រាប់ការផ្សាំលើមនុស្សដំបូងរបស់យើង ហើយជាក់ស្តែងយើងចង់ប្រុងប្រយ័ត្នបំផុត និងប្រាកដថាវានឹងដំណើរការល្អមុនពេលដាក់ឧបករណ៍ទៅក្នុងខួរក្បាលមនុស្ស”៕
