ភ្នំពេញ ៖ លោក សុខ ចិន្ដាសោភាឧបនាយករដ្ឋមន្ដ្រី រដ្ឋមន្ដ្រីក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និងលោក វ៉ាង វិនពីន ឯកអគ្គរដ្ឋទូតនៃសាធារណរដ្ឋប្រជាមានិតចិន ប្រចាំកម្ពុជានៅទីស្ដីការក្រសួង នាព្រឹកថ្ងៃទី៥ ខែកញ្ញា ឆ្នាំ២០២៤ ចុះហត្ថលេខារួមគ្នាលើកិច្ចព្រមព្រៀងស្ដីពីមូលនិធិពិសេសសម្រាប់គម្រោងកិច្ចសហប្រតិបត្តិការមេគង្គ-ឡានឆាង ឆ្នាំ២០២៤ ។មូលនិធិពិសេសនៃកិច្ចសហប្រតិបត្តិការមេគង្គ-ឡានឆាង ឆ្នាំ២០២៤ កម្ពុជាទទួលបានពីចិនសម្រាប់គម្រោងចំនួន៨ ដែលមានទំហំទឺកប្រាក់ប្រមាណ ២,១លានដុល្លារអាមេរិក សម្រាប់ការអនុវត្តផ្តោតលើវិស័យសំខាន់ដូចជា ទេសចរណ៍ សកម្មភាពដោះមីន កសិកម្ម អភិវឌ្ឍន៍ជនបទ ការលើកកម្ពស់ការយល់ដឹងពីកិច្ចសហប្រតិបត្តិការមេគង្គ-ឡានឆាង ការជំរុញសេដ្ឋកិច្ចក្នុងតំបន់ ការអប់រំបណ្តុះបណ្តាលបច្ចេកទេស និងវិជ្ជាជីវៈ ការកសាងសមត្ថភាព និងការគ្រប់គ្រងហានិភ័យទឹកជំនន់។ល។
លោករដ្ឋមន្ត្រីក្រសួងការបរទេសកម្ពុជាបានថ្លែងអំណរគុណចំពោះរដ្ឋាភិបាល និងប្រជាជននៃសាធារណរដ្ឋប្រជាមានិតចិន ដែលបានបន្តគាំទ្រផ្នែកហិរញ្ញវត្ថុសម្រាប់កម្ពុជា និងប្រទេសសមាជិកមេគង្គផ្សេងៗទៀត ក្នុងការអនុវត្តគម្រោងក្រោមមូលនិធិនៃកិច្ចសហប្រតិបត្តិការមេគង្គ-ឡានឆាង ដែលបានចូលរួមចំណែកយ៉ាងធំធេងក្នុងការអភិវឌ្ឍសេដ្ឋកិច្ចសង្គមនៅកម្ពុជា និងអនុតំបន់មេគង្គទាំងមូល និងបានគូសបញ្ជាក់ពីការប្តេជ្ញាចិត្តរបស់កម្ពុជាក្នុងការកសាងសហគមន៍មួយដែលមានវាសនារួមគ្នានៃសន្តិភាព វិបុលភាព និងការអភិវឌ្ឍប្រកបដោយចីរភាព។កម្ពុជាបានទទួលគម្រោងជាង៩០ ដែលមានទំហំទឹកប្រាក់ប្រមាណ៣៥ លានដុល្លារអាមេរិកពីចិនសម្រាប់ការអនុវត្តគម្រោងលើវិស័យសំខាន់ៗជាច្រើនក្នុងប្រទេសកម្ពុជា ក្នុងរយៈពេល៧ ឆ្នាំចុងក្រោយនេះ៕
