ស្ទឹងត្រែង៖ មន្ទីរកសិកម្មរុក្ខាប្រមាញ់និងនេសាទខេត្តស្ទឹងត្រែង បានចេញសេចក្តីជូនដំណឹងចំនួន២ច្បាប់ដាច់ដោយឡែកពីគ្នា គឺចេញសេចក្តីជូនដំណឹងជាលើកទី៣ចំពោះដីព្រៃជិត២ពាន់ហិកតានៅតាមបណ្តោយផ្លូវចូលវារីអគ្គិសនីសេសានក្រោម២ ស្ថិតក្នុងស្រុកសេសាន ដែលត្រូវបានកាប់ទន្ទ្រានយកធ្វើជាកម្មសិទ្ធិ និងផ្ទៃដី១កន្លែងផ្សេងទៀតទំហំជាង២ម៉ឺនហិកតា ជាប់ព្រំប្រទល់ស្រុកចំនួន២ ស្រុកសៀមប៉ាង និងស្រុកបុរីអូរស្វាយសែនជ័យ ស្ថិតក្នុងចំណុចភូមិកាចាញទឹក ភូមិកាចាញគោក ភូមិសំរោង ភូមិណាអូង ភូមិឫទ្ធីសែនជ័យ ដែលត្រូវបានកាប់ទន្ទ្រានផងដែរនោះ គឺត្រូវដកហូតយកមកគ្រប់គ្រងជាសម្បតិ្តរដ្ឋវិញ។ក្នុងលិខិតនោះបញ្ជាក់ដោយម៉ឺងម៉ាត់ថា ក្នុងករណីមិនអនុវត្តតាមខ្លឹមសារខាងលើ កម្លាំងគណៈបញ្ជាការឯកភាពរដ្ឋបាលខេត្ត និងកម្លាំងគណៈ បញ្ជាការឯកភាពរដ្ឋបាលស្រុកពាក់ព័ន្ធ នឹងចាត់វិធានការអនុវត្តតាមនីតិវិធីច្បាប់ ដោយនាំខ្លួនអ្នកពាក់ព័ន្ធជាក់ស្តែងដែលបានកាប់រានទន្ទ្រានដីព្រៃ និងបានសង់លំនៅដ្ឋានខុសច្បាប់នៅលើដីព្រៃនោះ ដើម្បីកសាងសំណុំរឿង បញ្ជូនទៅតុលាការ ផ្តន្ទាទោសតាមច្បាប់ ។ចំពោះអ្នកពាក់ព័ន្ធដែលកៀងគរឲ្យប្រជាពលរដ្ឋមកទន្ទ្រានដីនៅទីតាំងខាងលើដែលហៅថា(មេខ្យល់)ក៏ត្រូវផ្តន្ទាទោសដូចគ្នា ។សុំបញ្ជាក់ថា ដីព្រៃរបស់មន្ទីរកសិកម្មខាងលើត្រូវបានចុះបញ្ជីប្លង់រឹងរួចរាល់ហើយ ទុកប្រើប្រាស់ជាទ្រព្យសម្បត្តិ មិនអាចបុគ្គលណាម្នាក់កាប់ទន្ទ្រានយកធ្វើជាកម្មសិទ្ធិបានឡើយ ។ទោះបីយ៉ាងណានៅទីតាំងខាងលើនេះក៏មានប្រជាពលរដ្ឋរស់នៅអាស្រ័យផលច្រើដែរតែមិនដឆឹងថាអាជ្ញាធរខេត្តមានវិធានការដោះស្រាយបែបណានោះឡើយ?។
