ភ្នំពេញ៖ក្រុមក្មេងទំនើង៩នាក់ រួមទាំងអាវុធមានដែករឹងនិងដុំឥដ្ឋ ត្រូវបានកម្លាំងសមត្ថកិច្ចចាប់បញ្ជូនទៅអធិការដ្ឋាននគរបាលខណ្ឌចំការមន បន្ទាប់ពីពួកគេបានប្រើអំពើហិង្សា ទៅលើក្មេងទំនើង១ក្រុមទៀតនៅបរិវេណកោះពេជ្រ ចំណុចសួនកម្សាន្តមេអំពៅ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីវេលាម៉ោង១រំលងអធ្រាត្រឈានចូលថ្ងៃទី២៧ ខែឧសភា ឆ្នាំ២០២៤ ។តែអ្វីដែលគួភ្ញាក់ផ្អើលគឺថាបើតាមចម្លើយសារភាពរបស់ក្រុមយុវជនសង្ស័យទាំង៩នាក់បានឲ្យដឹងថា ខ្លួនបានមកតំបន់កោះពេជ្រនេះ គឺមករកលុយដោយទទួលសេវាកម្មបម្រើអារម្មណ៍ ពីក្រុមបុរសភេទទី៣ ដើម្បីបានកម្រៃ២ម៉ឺនរៀល ក្នុង១ដង នៅម្តុំគុម្ពសួនផ្កាក្នុងកោះពេជ្រ ។ តែពេលឃើញក្រុមជនរងគ្រោះមកទីតាំងរបស់ខ្លួន គិតថាពួកគេមកដណ្តើមភ្ញៀវ ទើបនាំគ្នាព្រួតដេញវាយតែម្តង ។
ក្រោយកើតហេតុ សមត្ថកិច្ចមូលដ្ឋានបាននាំខ្លួនក្រុមក្មេងស្ទាវទាំង៩នាក់ រួមទាំងវត្ថុតាងដែករឹង១ដើម និងដុំឥដ្ឋ១ដុំ និងជនរងគ្រោះទាំង៦នាក់ទៅកាន់អធិការដ្ឋាននគរបាលខណ្ឌចំការមន ដើម្បីសួរចម្លើយ និងអនុវត្តបន្តតាមនីតិវិធី ៕
