ត្បូងឃ្មុំ៖ ការបញ្ចប់តំណែងគឺពាក់ព័ន្ធករណី វីដេអូខ្លីបរយៈពេល ១នាទី និង៣០វិនាទី ដែលព្រះសង្ឃ១អង្គ មានជម្លោះពាក្យសម្តីនៅក្នុងសាលារៀន ក្នុងអំឡុងខែមិថុនា ឆ្នាំ២០២២កន្លងទៅ ត្រូវបានបែកធ្លាយបង្ហោះនៅតាមបណ្តាញសង្គម នៅថ្ងៃទី១៦ ខែឧសភា ឆ្នាំ២០២៤បើកុំតែមានការបែកធ្លាយក៏រឿងនេះមិនត្រូវបានដោះស្រាយឡើយ។
វីដេអូន មានការចែករំលែក និងវែកញែកជាច្រើនហូរហែនេះ ករណីយ៍័ព្រះសង្ឃអង្គនេះ បានធ្វើសកម្មភាពវាយទៅលើសិស្សសាលាបឋមសិក្សាអញ្ចើម ដោយមូលហេតុ សិស្សមិនបានរើសដុំថ្ម ទៅដាក់ក្នុងគ្រឹះទីចាត់ការ និងបណ្ណាល័យដែលកំពុងសាងសង់ តាមការបញ្ជារបស់លោក ខណៈព្រះអង្គ ជាគណៈកម្មការមួយរូបផងដែរនៅក្នុងសាលារៀននេះ។ក្រោយដឹងរឿងហេតុនេះ អាជ្ញាធរខេត្ត បានឲ្យជំនាញពាក់ព័ន្ធ និងព្រះមន្ត្រីសង្ឃ រួមគ្នាពិនិត្យ និងដោះស្រាយលើរឿងនេះ ជាក់ស្តែងតាមរយៈរបាយការណ៍។
លោក ហាក់ ហុន ប្រធានធម្មការ និងសាសនាខេត្តត្បូងឃ្មុំ នាល្ងាចថ្ងៃទី១៨ ខែឧសភា ឆ្នាំ២០២៤ បានឲ្យដឹងថា ព្រះសង្ឃអង្គនេះ មានឈ្មោះភិក្ខុ អ៊ុក ម៉ាឬទ្ធី ព្រះចៅអធិការវត្តឈើទាលជ្រុំ (ហៅវត្តកូនត្មាត) ស្ថិតក្នុងភូមិកូនត្មាត ឃុំអញ្ចើម ស្រុកត្បូងឃ្មុំ ខេត្តត្បូងឃ្មុំ ។អ្នកគ្រូម្នាក់នោះមានឈ្មោះ ប៊ុន ឆេងឡូត ជានាយិការរងនៃអនុវិទ្យាល័យអញ្ចើម ស្ថិតនៅភូមិ-ឃុំខាងលើដូចគ្នា។
ក្រោយមានជម្លោះ ក្នុងអំឡុងឆ្នាំ២០២២ អ្នកគ្រូ ប៊ុន ឆេងឡូត បានដាក់ពាក្យ ប្តឹងភិក្ខុ អ៊ុក ម៉ាឬទ្ធី ចំនួន០៣ចំណុច៖ទី១៖ ជេរប្រមាថទី២៖ គំរាមកំហែង ប៉ុនប៉ងធ្វើមនុស្សឃាត ហើយប្រើអាកប្បកិរិយាមិនសមរម្យមកលើខ្លួន។ទី៣៖ បង្កភាពអាណាធិបតេយ្យនៅកន្លែងអប់រំ (សាលាក្នុងម៉ោងសិក្សា) កាលពីថ្ងៃទី២០ ខែមិថុនា ឆ្នាំ២០២២ វេលាម៉ោង ១៤៖៥នាទីរសៀល។
ព្រមទាំងសូមទាមទារថ្លៃជំងឺចិត្តចំនួន ៦០,០០០,០០០រៀល និងសុំឱ្យដកព្រះគ្រូចៅអធិការវត្ត ព្រះតេជគុណព្រះនាម អ៊ុក ម៉ាឫទ្ធី ចេញពីវត្តឈើទាលជ្រុំ (កូនត្មាត) ហើយសូមមន្ត្រីសង្ឃសាលាអនុគណ រកយុត្តិធម៌ និងដោះស្រាយឱ្យអ្នកគ្រូ។
ភ្លាមៗ០៤ថ្ងៃបន្ទាប់ ពាក់ព័ន្ធរឿងនេះ នៅថ្ងៃទី២៤ ខែមិថុនា ឆ្នាំ២០២២ ព្រះគ្រូមធុរធម្មរង្សី វ៉ាន ដាវី ព្រះអនុគណស្រុកត្បូងឃ្មុំ លោក សេង សុខខឿន អភិបាលស្រុកត្បូងឃ្មុំ និងលោក ហាក់ ហុន ប្រធានមន្ទីរធម្មការ និងសាសនាខេត្តត្បូងឃ្មុំ រួមទាំងអ្នកពាក់ព័ន្ធ បានបើកកិច្ចប្រជុំនៅសាលាស្រុកត្បូងឃ្មុំ បានសម្រេចសម្របសម្រួល ដើម្បីបញ្ចប់បញ្ហា។ក្នុងនោះ ស្នើឲ្យអ្នកគ្រូ ប៊ុន ឆេងឡូត ដកពាក្យបណ្តឹង បន្ទាប់មកនឹងចាត់វិធានការរួមមាន៖ទី១៖ បញ្ចប់តំណែងភិក្ខុ អ៊ុក ម៉ារឹទ្ធី ពីចៅអធិការវត្ត ឈើទាលជ្រុំទី២៖ និមន្តចេញពីវត្ត ឈើទាលជ្រុំ (ហៅកូនត្មាត) ទៅគង់នៅវត្ត គីរីរស្មី (ហៅចុងអូរ) ឃុំរកាពប្រាំ ស្រុកត្បូងឃ្មុំ ខេត្តត្បូងឃ្មុំ វិញ។
ទី៣៖ ចំពោះគណៈកម្មការ លោកអាចារ្យវត្តនេះ ត្រូវរៀបចំសមាសភាពថ្មីឡើងវិញ បន្ទាប់ពីការតែងតាំងព្រះចៅអធិការថ្មីរួច។ទី៤៖ មន្ត្រីសង្ឃសាលាអនុគណស្រុកត្បូងឃ្មុំ អាជ្ញាធរមានសមត្ថកិច្ច ត្រូវចុះធ្វើបញ្ជីសារពើភ័ណ្ឌរបស់វត្ត ឈើទាលជ្រុំ (ហៅកូនត្មាត) ឲ្យបានមុនថ្ងៃដែលភិក្ខុ អ៊ុក ម៉ារឹទ្ធី និមន្តចេញពីវត្ត។លោក ហាក់ ហុន ឲ្យដឹងទៀតថា ដោយសារអ្នកគ្រូ ប៊ុន ឆេងឡូត មិនព្រមដកពាក្យបណ្តឹង ហើយបន្តទៅកាន់តុលាការ ក៏ផុតដែនសមត្ថកិច្ចមន្ទីរធម្មការ និងអនុគណស្រុក ក្នុងការសម្រួលដោះស្រាយ រឿងហេតុក៏បន្តអូសបន្លាយរហូតមកដល់ពេលនេះ។ប្រធានមន្ទីរធម្មការ និងសាសនាខេត្ត បានបញ្ជាក់ឲ្យដឹងថា ភ្លាមៗក្រោយពីផ្ទុះរឿងជាថ្មីនេះ នៅថ្ងៃទី១៧ ខែឧសភា ឆ្នាំ២០២៤ អាជ្ញាធរស្រុក និងព្រះមន្ត្រីសង្ឃស្រុក បានបើកកិច្ចប្រជុំ រហូតដល់ថ្ងៃទី១៨ ខែឧសភា ក៏សម្រេចបញ្ចប់តំណែងភិក្ខុ អ៊ុក ម៉ារឹទ្ធី ពីចៅអធិការវត្តឈើទាលជ្រុំ និងនិមន្តចេញពីវត្ត ទៅគង់នៅអនុគណស្រុកត្បូងឃ្មុំវិញ ដើម្បីបញ្ចប់រឿងផងដែរ។៕មភ
