អនុរដ្ឋមន្ត្រីការពារជាតិអូស្ត្រាលី លោក Hugh Jeffrey បាននិយាយថា រុស្ស៊ីនិងចិនកំពុងវ៉ាដាច់សហរដ្ឋអាមេរិកនិងសម្ព័ន្ធមិត្តរបស់ខ្លួនក្នុងការច្នៃប្រឌិតយោធា។
“រុស្ស៊ីនិងចិនកំពុងវ៉ាដាច់សហរដ្ឋអាមេរិកនិងសម្ព័ន្ធមិត្តរបស់ខ្លួននៅក្នុងវិស័យជាច្រើននៃការច្នៃប្រឌិតយោធា។ លទ្ធផលនៃការច្នៃប្រឌិត កិច្ចសហប្រតិបត្តិការវិនិយោគ និងការផលិតបច្ចេកវិទ្យាការពារជាតិ នឹងកំណត់ថា តើអ្នកណាមានគុណសម្បត្តិនៅក្នុងសង្គ្រាមយោធានាពេលខាងមុខ” អនុរដ្ឋមន្ត្រីក្រសួងការពារជាតិអូស្ត្រាលី លោក Hugh Jeffrey បាននិយាយ។
យោងតាមអនុរដ្ឋមន្ត្រីក្រសួងការពារជាតិអូស្ត្រាលី៖ “ទស្សនៈនេះបានទទួលការឯកភាពពីភាគីទាំងពីរនៃប៉ាស៊ីហ្វិក ហើយយើងពិតជាត្រូវការផ្លាស់ប្តូរអ្វីៗ។ នាពេលខាងមុខ សម្ព័ន្ធភាព AUKUS នឹងដើរតួនាទីយ៉ាងសំខាន់»។
លោក Hugh Jeffrey បានកោតសរសើរចំពោះការខិតខំប្រឹងប្រែងរបស់រដ្ឋបាលប្រធានាធិបតីអាមេរិក Joe Biden ក្នុងកិច្ចសហប្រតិបត្តិការជាមួយទីក្រុង Canberra ដើម្បីដោះស្រាយហានិភ័យនៅក្នុងតំបន់។ លោកបានអំពាវនាវឱ្យទីក្រុងវ៉ាស៊ីនតោនដោះស្រាយបញ្ហាឧបសគ្គផ្លូវច្បាប់ចំពោះប្រតិបត្តិការនៃសម្ព័ន្ធភាព AUKUS រវាងសហរដ្ឋអាមេរិក ចក្រភពអង់គ្លេស និងអូស្ត្រាលី។
ជាមួយគ្នានេះ លោក Jeffrey ក៏បានសរសើរសមភាគីរបស់លោកនៅសហរដ្ឋអាមេរិក ដោយនិយាយថា គំរូយោធា-ឧស្សាហកម្មដែលបានអភិវឌ្ឍក្នុងសម័យសង្គ្រាមត្រជាក់ មិនស័ក្តិសមសម្រាប់បញ្ហាប្រឈមនៃយុគសម័យថ្មី។
សម្ព័ន្ធ AUKUS ត្រូវបានបង្កើតឡើងក្នុងខែកញ្ញា ឆ្នាំ 2021 ដែលរំពឹងថានឹងផ្តល់ឱ្យឧស្សាហកម្មការពារជាតិអូស្ត្រាលីនូវសមត្ថភាពក្នុងការសាងសង់នាវាមុជទឹកនុយក្លេអ៊ែរ និងជំនួសនាវាដែលប្រើប្រេងម៉ាស៊ូតទាំងអស់។ នេះជាកិច្ចខិតខំប្រឹងប្រែងដើម្បីទប់ស្កាត់ការរីកចម្រើនរបស់កងទ័ពជើងទឹកចិនក្នុងតំបន់។
ការណ៍ពិតដែលថាអូស្ត្រាលី ចក្រភពអង់គ្លេស និងសហរដ្ឋអាមេរិកកំពុងរួមគ្នាក្នុងយន្តការសន្តិសុខថ្មីមួយបង្ហាញពីកង្វល់រួម និងការឯកភាពរបស់ប្រទេសទាំងបីក្នុងកិច្ចខិតខំប្រឹងប្រែងដើម្បីឆ្លើយតបទៅនឹងបញ្ហាប្រឈមនៃសតវត្សទី 21 ដើម្បីរក្សាតំបន់ឥណ្ឌា មហាសមុទ្រ – ប៉ាស៊ីហ្វិក មានសន្តិភាព និងស្ថិរភាព៕ ដោយ៖ ធីរីណា
