ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ប្ដេជ្ញាធ្វើឲ្យផ្លូវរថភ្លើងនៅកម្ពុជា ក្លាយទៅជាផ្លូវល្បឿនលឿនទាំងអស់ ដោយលើកទឹកចិត្តដល់បណ្ដាប្រទេសនានា ធ្វើការវិនិយោគផ្លូវរថភ្លើងល្បឿនលឿននេះ។ថ្លែងក្នុងពិធីប្រគល់សញ្ញាបត្រ ដល់គរុនិស្សិតបច្ចេកទេស និងនិស្សិតនៃវិទ្យាស្ថានជាតិ បណ្ដុះបណ្ដាលបច្ចេកទេស នៅថ្ងៃទី២៧ ខែកុម្ភៈ ឆ្នាំ២០២៣ សម្តេចតេជោមានប្រសាសន៍ថា រថភ្លើងនៅកម្ពុជាសព្វថ្ងៃនេះមានល្បឿនតែ ៣០គីឡូម៉ែត្រ ក្នុងមួយម៉ោងប៉ុណ្ណោះ ខណៈរថភ្លើងល្បឿនលឿនរត់បាន ១៣០គីឡូម៉ែត្រ ក្នុងមួយម៉ោង ធ្វើឲ្យចំណេញក្នុងការដឹកជញ្ជូន។a hun techno
សម្ដេចតេជោបញ្ជាក់ថា «យើង ត្រូវតែធ្វើឲ្យផ្លូវរទះភ្លើងរបស់យើង ក្លាយទៅជារទះភ្លើងល្បឿនលឿនទាំងអស់។ យើង ក៏អំពាវនាវលើកទឹកចិត្តឲ្យ ប្រទេសនានាចូលរួម ហើយចូលរួមធ្វើ BOT ដោយយើងមិនចង់ខ្ចីប្រាក់គេ ក្នុងទំហំមួយដ៏ធំធ្វើផ្លូវរត់ភ្លើងល្បឿលឿន ដែលពីភ្នំពេញ ទៅប៉ោយប៉ែត ពីភ្នំពេញ ទៅក្រុងព្រះសីហនុ ជំនួសឲ្យផ្លូវដែកចាស់».។ក្រៅពីរឿងខាងលើរាជរដ្ឋាភិបាលកម្ពុជា បានសម្រចបញ្ចេញថវិកា ២៣០លានដុល្លារអាមេរិក សម្រាប់សាងសង់ស្ពាន ដោយឆ្លងកាត់ខេត្តកណ្តាល ព្រៃវែង និងចូលទៅកាន់ខេត្តស្វាយរៀង ក្នុងគម្រោងផ្លូវល្បឿនលឿន ភ្នំពេញ-បាវិត។ ផ្លូវល្បឿនលឿនភ្នំពេញ-បាវិត នឹងអាចបើកដំណើរការសាងសង់ ក្នុងឆ្នាំ២០២៣នេះ ដោយចំណាយជាង ១ពាន់លានដុល្លារ។នេះជាការប្រកាសឲ្យដឹងដោយសម្តេច។
ឆ្លៀតឱកាសនោះដែរ សម្តេចនាយករដ្ឋមន្ដ្រី លើកឡើងថា ជំនាញបច្ចេកទេស គឺជាជំនាញត្រូវនឹងតម្រូវការចាំបាច់ នៃសង្គមបច្ចុប្បន្នដែលត្រូវបង្កើន និងពង្រឹងឲ្យកាន់តែល្អប្រសើរថែមទៀត។ ទន្ទឹមនឹងនោះ ក៏ត្រូវឲ្យមានការចាប់អារម្មណ៍ លើជំនាញវិជ្ជាជីវៈដូនតាដូចជា៖ ចម្លាក់ តម្បាញ ជាដើម ដែលរដ្ឋកំពុងតែគាំពារ និងលើកទឹកចិត្តបន្ថែមទៀត។សម្ដេចបន្ដថា ការបណ្ដុះបណ្ដាលជំនាញវិជ្ជាជីវៈនេះ មានតម្រូវការកាន់តែធំ ទើបដាក់ចេញផែនការគោល នយោបាយឲ្យក្រសួងការងារ និងស្ថាប័នពាក់ព័ន្ធធ្វើការបណ្ដុះបណ្ដាល លើជំនាញវិជ្ជាជីវៈនេះដល់ សិស្សនិស្សិតកម្ពុជាប្រមាណ ១,៥ លាននាក់នៅឆ្នាំក្រោយ៕
