ប្រែសម្រួល : កញ្ញាដាលីស (The Drive) ៖ នៅក្នុងការវិឌ្ឍដ៏គួរឱ្យភ្ញាក់ផ្អើលមួយ ដ្រូនថ្មីរបស់បារាំងឈ្មោះថា Aarok បានលេចចេញរូបរាងគំរូ នៅមុនការតាំងពិព័រណ៍ពាណិជ្ជកម្ម Paris Air Show នៅសប្តាហ៍ក្រោយ។ ប្រព័ន្ធដ្រូន Aarok ឬ UAS គឺជាការបន្ថែមថ្មីមួយចំពោះវិស័យដែនអាកាសរយៈកម្ពស់មធ្យមបើកបរបានយូរ (MALE) និងមានគោលបំណងហោះហើរស៊ើបការណ៍ ឃ្លាំមើល និង ឈ្លប ក៏ដូចជាបេសកកម្មវាយប្រហារផងដែរ។ សម្រាប់បេសកកម្មវាយប្រហារ វាគ្រោងនឹងប្រើសម្រាប់ដឹកគ្រាប់បញ្ជាទិស AASM ផលិតដោយបារាំងដែលមានសមត្ថភាពបាញ់បានឆ្ងាយនិងផ្ទុកក្បាលគ្រាប់ផ្សេងគ្នា។
Aarok គឺជាផលិតផលរបស់អ្នកម៉ៅការការពារជាតិបារាំងដែលគេមិនសូវស្គាល់ពីមុន គឺក្រុមហ៊ុន Turgis & Gaillardដែលបានពង្រីកប្រតិបត្តិការរបស់ខ្លួនជាលំដាប់នៅក្នុងប្រទេសកំណើតរបស់ខ្លួន រហូតឈានដល់ការចេញដ្រូនគំរូ Aarokដ៏គួរឱ្យចាប់អារម្មណ៍នេះ។ ដោយមានទម្ងន់ប្រហែល ៥,៤ តោនពេលហោះឡើង ដ្រូននេះបានទាក់ទាញការយកចិត្តទុកដាក់លើទំហំរបស់វា។ ស្លាបប្រវែង ២២ ម៉ែត្ររបស់វាពិតជាមានទំហំធំជាងដ្រូនរបស់អាម៉េរិក MQ-9A Reaper ដែលមានស្លាបប្រវែង ២១ ម៉ែត្រ ប៉ុន្តែតួដ្រូននេះមានភាពសំពីងសំពោងជាងបើធ្វើការប្រៀបធៀប។
ថាមពលសម្រាប់ដ្រូន Aarok គឺចេញពីម៉ាស៊ីន Pratt & Whitney Canada PT6 turboprop ដែលមានកម្លាំង ១.២០០ សេះ ដែលពឹងលើស្លាបចក្រធម្មតានៅក្បាលរបស់វា។ នៅពេលអនាគត ក្រុមហ៊ុន Turgis & Gaillard គ្រោងនឹងដំឡើងម៉ាស៊ីន Safran Ardiden 3 ឬ GE Aviation Catalyst turboprop។
ក្រៅពីទម្ងន់ហោះហើរអតិបរមា ៥,៤ តោន ចំណុចផ្សេងទៀតរបស់ដ្រូន Aarok រួមមានទម្ងន់ទទេប្រហែល ២,៥ តោន និង ការផ្ទុកទម្ងន់អតិបរមាបាន ២.៧២១ គីឡូក្រាម រួមទាំងអាវុធរហូតដល់ទម្ងន់ ១.៥០០ គីឡូក្រាម។
ដ្រូននេះអាចហោះហើរឥតឈប់បានជាង២៤ម៉ោង។ សមត្ថភាពនេះធ្វើឱ្យដ្រូន Aarok ស្ថិតក្នុងប្រភេទស្រដៀងនឹងដ្រូន MQ-9A Reaper ដែលដាក់ឱ្យប្រើរួចជាស្រេចក្នុងកងទ័ពអាកាសបារាំង។
លក្ខណៈពិសេសបំផុតរបស់ដ្រូននេះគឺការអាចចុះចតលើផ្លូវរដិបរដុបបាន៕
