ប្រែសម្រួល : កញ្ញាដាលីស (ប៊ីប៊ីស៊ី) ៖ អង្គការណាសាបានសរសេរលើ Twitterកាលពីថ្ងៃអង្គារទី៧មីនាថា អាចម៍ផ្កាយដែលទើបរកឃើញថ្មីមួយមានឱកាសតិចណាស់ក្នុងការបុកទង្គិចនឹងផែនដីក្នុងឆ្នាំ២០៤៦។
ប្រសិនបើវាបុកមែន អាចម៍ផ្កាយដែលមានទំហំប៉ុនអាងហែលទឹកអូឡាំពិកនេះអាចនឹងមកដល់នៅទិវានៃក្តីស្រឡាញ់ឆ្នាំ ២០៤៦ នេះបើយោងតាមការគណនារបស់ណាសា។
ណាសានិយាយថា គម្លាតកៀកបំផុត ដែលអាចម៍ផ្កាយនេះរំពឹងមកជិតផែនដី គឺប្រហែល ១,៨ លានគីឡូម៉ែត្រ។
ប៉ុន្តែក្រុមអ្នកស្រាវជ្រាវនៅកំពុងប្រមូលទិន្នន័យ ដែលពួកគេនិយាយថាអាចផ្លាស់ប្តូរការព្យាករណ៍។
អាចម៍ផ្កាយឈ្មោះ 2023 DW នេះមានឱកាសប្រហែល ១ ក្នុងចំណោម ៥៦០ ក្នុងការបុកផែនដី នេះបើយោងតាមណាសា។ វាជាថ្មអវកាសតែមួយគត់នៅក្នុងបញ្ជីហានិភ័យរបស់ណាសាដែលជាប់ចំណាត់ថ្នាក់លេខ ១ នៅលើមាត្រដ្ឋានគ្រោះថ្នាក់ Torino Impact Hazard ។
មាត្រដ្ឋាន ដែលរាប់ចាប់ពី ០ ដល់ ១០ គឺវាស់ហានិភ័យនៃវត្ថុអវកាសបុកជាមួយផែនដី។ វត្ថុផ្សេងទៀតទាំងអស់នៅលើមាត្រដ្ឋានចំណាត់ថ្នាក់ 0 គឺបង្ហាញថាគ្មានហានិភ័យសម្រាប់ការបុកទង្គិចនោះទេ។
មន្ទីរពិសោធន៍ Jet Propulsion Laboratory (JPL) របស់ណាសាបាននិយាយថា មាត្រដ្ឋានលេខ ១ មានន័យថា ការបុកទង្គិចពិតប្រាកដគឺមិនទំនងកើតឡើងទេ ហើយគ្មានហេតុផលសម្រាប់ការព្រួយបារម្ភជាសាធារណៈនោះទេ៕